"لأنك مصر" قصيدة جديدة لفاطمة المرسى

"لأنك مصر" قصيدة جديدة لفاطمة المرسى


الجمعة، 29 يوليو 2011 - 17:46

[ندعوك للتسجيل في المنتدى أو التعريف بنفسك لمعاينة هذه الصورة]

صورة أرشيفية


بَلا روما بَلا موسكو بلاها جنيف
بلا تمثال لحريه وشعلة زيف
أقارن مين وأوصف إيه
وإنتى الأولى والتانيه
وإنتى فى قلبى محتله
لكل مراكز التصنيف
واخاف فى البعد يهجرنى
جمال سحرك ولو ثانيه
ومين بعدك أعد غيابه بالثانيه
أحن لروحك الصافيه
ومره أحن لجنونك
لعرق السوس وأنغامه بتطربنى
ومتزين بورد وفل ع الأكتاف
وحمص شام لكن مصرى
وعاشق وحدة الأوطان
لكباية عصير بارده من الخروب
لا يمكن عن هواها أتوب
وحبة حُب ع الكورنيش
وترمس باللمون يهوس
وكل الناس برغم الفقر بتغنى
وكلمة تملّى أسمعها فى كل مكان
(عمااااااااار يامصر)
ومشتاقه
لصحن الفول وعيش بلدى
بايد خباز ولد أسمر عشق طينك
ودمه ميَّه من نيلك
وألف يمين حلف مرات ما تتعدش
ما يخبز الا من قمحك
وجمب الفول بصل أخضر
بلون قلبك
ورشة زيت على وشه لكن م الحار
حرارته من لهيب حبك
وخضرى بالخضار سارح
على العربيه فى الشارع
يبيغ جرجير
ومواله يعين الشقيانين ع الصبر
وعم محمد الفوال بيغرف لوز
من القِِِِدره اللى مدفونه فى قش الرز
وشاى بيقولوا فى الخمسينه
من تقله بيحبس حبس
أعيش مشتاقه طول عمرى لأحضانك
وأرسم لوحه لجمالك وأوصافك
وأكتب كل أشعارك على قلبى
لأنك مصر